BAKI, AzerVoice
Alimlər həm material, həm də robot funksiyasını yerinə yetirən “Metabot” hazırlayıblar.
AzerVoice xəbər verir ki, Prinston
Universitetinin tədqiqatçıları mühərrik və ya daxili mexaniki
hissələri olmadan hərəkət edə, formasını dəyişə və elektromaqnit
siqnallarına cavab verə bilən yeni bir material yaradıb.
Bu innovativ quruluşa “metabot” adı verilib.
“Nature” jurnalında dərc olunan araşdırmaya əsasən, metabot strukturu origami sənətindən ilham alınaraq hazırlanıb. Tədqiqatın rəhbəri Qlaucio Paulino bildirib ki, bu material xarici maqnit sahəsi ilə idarə olunaraq robot kimi funksiyalar yerinə yetirə bilir.
Metabot sadə plastik elementlər və xüsusi maqnit birləşmələrinin qarışığından hazırlanıb. Onun simmetrik, güzgü formasında dizayn edilmiş modulları əyilmə, büzülmə və fırlanma kimi mürəkkəb hərəkətləri yerinə yetirməyə imkan verir.
Origami texnikasında tanınan “Kresling naxışı”ndan istifadə edilərək formalaşdırılan bu struktur, maqnit sahəsi tətbiq olunduqda qatlanaraq və ya açılaraq hərəkət edə bilir. Bu, materiala öz fiziki quruluşunu dəyişmədən robotik funksiyalar yerinə yetirmək imkanı verir.
Tədqiqatçılar bildirirlər ki, gələcəkdə metabot texnologiyası tibbi mikrorobotlar, dərman daşıyıcıları, cərrahi yardım sistemləri və enerjini udan qurğular kimi müxtəlif sahələrdə tətbiq edilə bilər. Bundan əlavə, metabot səth temperaturunu dəyişə bilmək qabiliyyəti ilə termorequlyasiya funksiyası da təklif edir.
Metabotun ən diqqətçəkən xüsusiyyətlərindən biri isə bəzi hallarda fizika qanunlarına zidd görünən davranışlar nümayiş etdirməsidir. Məsələn, saat əqrəbi istiqamətində və əks istiqamətdə hərəkət etdikdən sonra yenidən başlanğıc mövqeyinə qayıtmalı olan bir obyektin əksinə, metabot bu dövrəyə uyğun gəlməyərək fərqli nəticələr göstərə bilir.
Bu xüsusiyyət histerezis fenomeninin — yəni sistemin gecikmiş cavab reaksiyasının — fiziki modelləşdirilməsinə imkan verir və mühəndislik, iqtisadiyyat kimi sahələrdə tətbiq üçün yeni imkanlar açır.
