BAKI, AzerVoice

Yer kürəsini vuran ən güclü günəş fırtınası 14 min 300 il əvvəl baş verib.

AzerVoice xəbər verir ki, alimlər Yer tarixində indiyə qədər qeydə alınmış ən güclü günəş fırtınasının təxminən 14 min 300 il əvvəl — eramızdan əvvəl 12.350-ci ildə baş verdiyini müəyyən ediblər.

Finlandiyanın Oulu Universitetinin apardığı araşdırmalar zamanı ağac halqaları və buz nüvələrinin təhlilindən istifadə olunub. Nəticələrə görə, bu kosmik hadisə atmosferdə karbon-14 izlərinin kəskin şəkildə artmasına səbəb olub.

SOCOL:14C-Ex adlı iqlim modeli ilə aparılan simulyasiyalara əsasən, bu geomaqnit qasırğası müasir dövrdə qeydə alınan ən güclü günəş fırtınasından 500 dəfə güclü olub.

Qeyd olunur ki, günəşdən gələn yüklü hissəciklər Yer atmosferinə daxil olduqda karbon-14 izotopunun səviyyəsi artır və bu dəyişikliklər min illərlə ağac halqalarında iz buraxır.

Mütəxəssislər hesab edirlər ki, gələcəkdə baş verə biləcək analoji miqyaslı günəş fırtınaları müasir texnoloji infrastruktur — o cümlədən peyk rabitəsi, enerji şəbəkələri və naviqasiya sistemləri üçün ciddi təhdid yarada bilər.