BAKI, AzerVoice
Avropa İttifaqı TikTok-a rekord cəza kəsib.
AzerVoice xəbər verir ki, Avropa İttifaqı sosial media nəhəngi TikTok-u şəxsi məlumatların təhlükəsizliyinə dair tələbləri pozduğuna görə 530 milyon avro cərimələyib.
Cəzanın əsas səbəbi kimi TikTok-un Avropa istifadəçilərinin şəxsi məlumatlarını Çində saxlaması və bu məlumatların Pekin hökumətinin nəzarətinə məruz qala biləcəyi təhlükəsi göstərilib. İrlandiya Məlumatların Mühafizəsi Komissiyası (DPC) tərəfindən aparılan araşdırma nəticəsində ByteDance şirkətinə məxsus TikTok-un məlumatların təhlükəsizliyinə dair Aİ tələblərini yerinə yetirmədiyi bildirilib.
TikTok isə qərara etiraz edib. Şirkət, İrlandiya orqanlarının iddialarını rədd edərək, Çin hökumətinin Avropa istifadəçilərinə dair heç vaxt məlumat tələb etmədiyini və bu qərarla razılaşmadıqlarını açıqlayıb. “Biz bu qərarı düzgün hesab etmirik və apellyasiya şikayəti verməyi planlaşdırırıq.” - deyə TikTok-un Avropa üzrə ictimai əlaqələr rəhbəri Kristine Qrahn qeyd edib.
Qeyd edək ki, TikTok-un Çinə məxsusluğu və topladığı geniş həcmli məlumatlar — o cümlədən məkan, cihaz və baxış vərdişləri — bir çox ölkədə təbliğat və casusluq riskləri ilə bağlı müzakirələrə səbəb olub. ABŞ da daxil olmaqla bir sıra ölkələr platformaya qarşı hüquqi və texniki məhdudiyyətlər tətbiq etməyi gündəmə gətirib.
