BAKI,AzerVoice

Hizbullah Livan prezidenti Cozef Aunla görüşdə təşkilatın silahsızlaşdırılması məsələsinə dair narahatlıqlarını açıq şəkildə dilə gətirib. AzerVoice xəbər verir ki, görüş Hizbullahın parlament fraksiyasının rəhbəri, millət vəkili Məhəmməd Raadın prezident sarayına etdiyi səfər zamanı baş tutub. Səfər prezident Aunun “yalnız rəsmi orqanların silaha sahib olacağı” yönündəki sərt çıxışından bir neçə saat sonra reallaşıb. Qeyd edək ki, yaxın günlərdə hökumət bu məsələni müzakirəyə çıxarmağa hazırlaşır.

Livan prezidentliyindən görüşlə bağlı rəsmi açıqlama verilməsə də, Hizbullahın media orqanları görüşün “bir sıra məsələlər üzrə açıq dialoq formatında keçdiyini” və “ümumilikdə müsbət atmosferdə” baş tutduğunu bildirib. Bildirilir ki, sonrakı günlərdə bu prosesin konturları daha da aydınlaşacaq.

Hizbullah və Livan ordusu arasında qarşıdırma qaçınılmazdır

Livan prezidenti Cozef Aun cari ilin əvvəlində etdiyi açılış nitqində dövlətin silahlı güc üzərində inhisarını bərpa etməli olduğunu vurğulamışdı. Aun, 31 iyul tarixində isə bu çağırışı daha da sərtləşdirərək, bütün silahlı qüvvələrin, o cümlədən Hizbullahın silahlarının Livan ordusuna təhvil verilməsini tələb etdi. Bu mövqe beynəlxalq aləmdə – xüsusilə ABŞ, Fransa və Səudiyyə Ərəbistanı başda olmaqla Körfəz ölkələri tərəfindən müsbət qarşılanıb, lakin əsas şərt bir daha xatırladılıb: Livan hökuməti Hizbullah silahlarına dair konkret bir plan təqdim etməyincə, nə iqtisadi yardım, nə də cənub bölgəsinin yenidən qurulması reallaşacaq.

Görüşdə hər hansı konkret razılaşmanın əldə edilmədiyi, lakin mövzunun geniş və davamlı prezident dialoqu çərçivəsində müzakirə olunacağını qeyd edilir. Bu isə prezident Aun, parlament sədri Nəbih Bərri və baş nazir Nəvvaf Salam arasında daha dərin siyasi təmasların davam edəcəyinə işarədir.

Hazırda Livanda ölkənin daxili sabitliyini təhlükəyə atmadan qəbul oluna biləcək ortaq formulların axtarışı davam edir. Gözləntilərə görə, yaxın günlərdə bu istiqamətdə konkret təkliflər masaya qoyulacaq.