BAKI, AzerVoice,Orxan Qədirzadə
İordaniya Silahlı Qüvvələri Qəzzadan daha bir qrup xəstə uşağın təxliyəsini həyata keçirib.
AzerVoice xəbər verir ki, çərşənbə axşamı 20 xəstə uşaq və onlara müşayiət edən 58 ailə üzvü tibbi müalicə üçün İordaniyaya gətirilib. Bu, mart ayında kral sərəncamı ilə başlanan və fələstinlilərə dəstək məqsədi daşıyan “İordaniya Tibb Dəhlizi” humanitar təşəbbüsü çərçivəsində təxliyə olunan 17-ci uşaq qrupudur.
Təxliyə olunan uşaqlar İordaniya Səhiyyə Nazirliyi və Ümumdünya Səhiyyə Təşkilatının dəstəyi ilə ölkədəki xəstəxanalarda müalicə alacaqlar.
Məlumata görə, 2023-cü ilin oktyabrından bəri İordaniya Qəzzaya 181-dən çox yardım karvanı, ümumilikdə 7 932 yük maşını göndərib. Yardımlar İordaniya Haşimilər Xeyriyyə Təşkilatı, Dünya Ərzaq Proqramı və World Central Kitchen ilə birgə koordinasiya olunub.
Bundan əlavə, İordaniya Silahlı Qüvvələri müharibə başlayandan bəri əraziyə 421 hava yardımı atıb, onların 284-ü beynəlxalq tərəfdaşlarla birgə həyata keçirilib.