BAKI,AzerVoice, Orxan Qədirzadə
Türkiyənin Milli Kəşfiyyat Təşkilatının (MİT) rəhbəri İbrahim Kalın İstanbulda HƏMAS Siyasi Bürosunun Müzakirə Heyətinin rəhbəri Xəlil Əl-Həyyə və onu müşayiət edən nümayəndə heyəti ilə görüş keçirib.
AzerVoice-un məlumatına görə, görüş zamanı HƏMAS tərəfi “Qəzza Atəşkəs Razılaşması” çərçivəsində atəşkəsin əldə olunması və prosesin izlənilməsi istiqamətində oynadığı vasitəçi və təminatçı roluna görə başda Türkiyə Prezidenti Rəcəb Tayyib Ərdoğan olmaqla Türkiyəyə təşəkkürünü bildirib.
Bununla yanaşı, nümayəndə heyəti İsrailin atəşkəs müddətində törətdiyi pozuntulara baxmayaraq, HƏMAS-ın razılaşmaya sadiqliyini bir daha təsdiqlədiyini qeyd edib.
Görüşdə tərəflər atəşkəs prosesinin sağlam şəkildə davam etməsi üçün atılacaq addımları, mövcud maneələrin aradan qaldırılması yollarını, habelə razılaşmanın növbəti mərhələlərinin icrası üzrə perspektivləri müzakirə ediblər.
Təmaslar zamanı Türkiyənin Qəzzaya göstərdiyi humanitar yardım fəaliyyəti və beynəlxalq təşkilatlarla əməkdaşlıq çərçivəsində daha çox yardımın bölgəyə çatdırılması istiqamətində görülən işlər barədə məlumat verilib.