BAKI, AzerVoice, Fərid Mikayılov

Avropa Parlamenti, qəbul etdiyi yeni qərarla Avropa İttifaqına üzv ölkələri Fələstin Dövlətini tanımağı nəzərdən keçirməyə çağırıb.

AzerVoice xəbər verir ki, qərarın məqsədi “iki dövlətli həll” istiqamətində konkret addım atmaq kimi dəyərləndirilir.

Qərar məcburi xarakter daşımır, lakin üzv dövlətlərə birbaşa tövsiyə mahiyyəti daşıyır. Parlament daha əvvəl “prinsipcə Fələstin dövlətinin tanınmasını” dəstəkləmişdi, lakin bu dəfə qəbul edilən sənəd hökumətləri daha açıq şəkildə hərəkətə keçməyə dəvət edir.

Sənəd 305 lehinə, 151 əleyhinə və 122 bitərəf səslə qəbul olunub.

Səsvermə uzun və gərgin şəraitdə keçib. Deputatlar Qəzza ilə bağlı dəyişikliklərə səsvermə üçün iclasa fasilə verilməsini tələb ediblər. Ən çox müzakirə doğuran məqamlardan biri isə İsrailin Qəzzaya hücumlarının “soyqırım” kimi adlandırılıb-adlandırılmaması olub.

Nəticədə “soyqırım əməlləri” ifadəsi səsvermədə qəbul edilməyib və mətndən çıxarılıb.

Qərar hüquqi baxımdan bağlayıcı olmasa da, Avropa Parlamentinin bu addımı Fələstin məsələsində Aİ daxilində artan siyasi təzyiqi və İsrailin Qəzzadakı hərbi əməliyyatları fonunda müzakirələrin yeni mərhələyə keçdiyini göstərir.