BAKI,AzerVoice, Fərid Mikayılov

İran Xarici İşlər Nazirliyi Ərəb Liqasının xarici işlər nazirlərinin yekun bəyanatında yer alan Əbu Musa, Böyük Tonb və Kiçik Tonb adaları ilə bağlı irəli sürülən iddiaları rədd edərək, onların “əsassız və yalan” olduğunu bəyan edib.

AzerVoice xəbər verir ki, nazirliyin açıqlamasında qeyd olunub ki, bu adalarla bağlı təkrarlanan əsassız iddialar onların coğrafi, tarixi və hüquqi reallığını dəyişməyəcək.

“İranın bu adalarda həyata keçirdiyi bütün tədbirlər ölkənin suveren hüquqları, təhlükəsizliyi və milli maraqlarının qorunması çərçivəsindədir”- deyə nazirlikdən bildirilib.

İran, Ərəb Liqasının İsrailin Qəzzada həyata keçirdiyi soyqırımı pisləməsini alqışlayaraq, təşkilatı İslam-Ərəb həmrəyliyini möhkəmləndirməyə və diqqəti əsas məsələdən – İsrailin regiondakı işğal və cinayətlərindən yayındıracaq addımlardan çəkinməyə çağırıb.

Açıqlamada həmçinin, İranın Yəmənə hərbi yüklər göndərməsi və daxili işlərinə qarışması ilə bağlı iddialar qəti şəkildə təkzib olunub.

“Bu cür uydurma iddialar əsasən Sionist rejim tərəfindən irəli sürülür və İslam ümmətinin maraqlarına xidmət etmir. Halbuki İsrail işğal olunmuş Fələstində soyqırım törətməkdə, Suriya və Livanda təcavüzkar siyasət aparmaqda və Yəmənə hücumlar təşkil etməkdədir. Bütün bunlar ABŞ-ın tam dəstəyi ilə həyata keçirilir”- deyə bəyənatda qeyd olunub.

Regional əməkdaşlığa çağırış

İran Xarici İşlər Nazirliyi bir daha ölkənin yaxşı qonşuluq siyasətinə, dövlətlərin suverenliyi və ərazi bütövlüyünə hörmətə, daxili işlərə qarışmama prinsipinə sadiqliyini xatırladıb.

Bəyanatda vurğulanıb ki, Qərbi Asiyada, Fars körfəzində və Oman dənizində uzunmüddətli sabitlik və təhlükəsizlik yalnız regional ölkələrin iştirakı ilə, xarici güclərin dağıdıcı müdaxiləsindən kənar şəkildə təmin oluna bilər.