BAKI, AzerVoice, Səməd Əyyubov

Ümumdünya Səhiyyə Təşkilatının (ÜST) baş direktoru Tedros Adhanom Gebreyesus İsraili Qəzzadakı humanitar böhranı dayandırmağa çağırıb.

AzerVoice-un məlumatına görə, o bildirib ki, Qəzza xalqını aclığa məhkum etmək İsrailin təhlükəsizliyini artırmayacaq.

"İnsanların aclıqdan ölməsi qarşısı alına biləcək faciədir. İsrail bunu istənilən an dayandıra bilər" - deyə, o bəyan edib.

“Ərzaq yükləri çox yaxın məsafədə olduğu halda insanların aclıqdan ölməsi qəbuledilməzdir. Qəzza əhalisini ac saxlamaq nə İsrailin təhlükəsizliyini təmin edəcək, nə də girovların azad olunmasına kömək edəcək. Mülki əhalini aclığa məhkum etmək heç vaxt müharibə üsulu ola bilməz. Bu, hərbi cinayətdir və gələcək münaqişələrdə təhlükəli presedent yaradır”, - Gebreyesus əlavə edib.

ÜST rəhbəri bildirib ki, ötən həftə Qəzzanın bəzi bölgələri İsrailin hücumları nəticəsində ağır bombardmana məruz qalıb. Onun sözlərinə görə, vəziyyət bu cür davam edərsə, artıq ciddi qida çatışmazlığı yaşayan təxminən 1 milyon insanın su və sanitariya sistemləri də çökə bilər.

Gebreyesus xatırladıb ki, iki həftə əvvəl Qəzzanın bəzi bölgələrində rəsmi olaraq aclıq elan olunub. O qeyd edib ki, 2023-cü ilin oktyabrından bəri ən azı 370 nəfər qida çatışmazlığından dünyasını dəyişib, onların 300-dən çoxu yalnız son iki ayda həlak olub.

“Aclığın olduğu yerdə xəstəlik də yayılır”, - deyə ÜST rəhbəri xəbərdarlıq edib. O bildirib ki, yemək və təmiz suyun çatışmazlığı, sıx şəraitdə yaşamaq immuniteti zəiflədir və xəstəliklərə yoluxma hallarını artırır. Bu səbəbdən, təcili tibbi yardıma ehtiyacı olan insanların Qəzzadan təxliyəsi üçün səylərin davam etdiyini vurğulayıb.

Qeyd edək ki, ÜST 2023-cü ilin oktyabr ayından bəri 7 640-dan çox xəstənin (5 300-ü uşaq olmaqla) təxliyyəsinə dəstək verib. Hazırda isə 15 mindən çox insan xüsusi tibbi yardıma ehtiyac duyur, onların 3 800-ü uşaqdır. Təxliyə gözləyən 700-dən çox insan, o cümlədən təxminən 140 uşaq həyatını itirib.