BAKI, AzerVoice, Səməd Əyyubov

Almaniyanın xarici işlər naziri Yohan Vadeful bu gün İsraili Qəzza şəhərinə hücum planlarını dayandırmağa çağırıb və bu addımın humanitar vəziyyəti ciddi şəkildə pisləşdirəcəyi barədə xəbərdarlıq edib.

AzerVoice xəbər verir ki, Vadeful bu barədə israilli həmkarı Gideon Saar ilə telefon danışığından sonra “X” sosial şəbəkəsində paylaşım edib.

O, Qəzza zolağına daha çox humanitar yardımın çatdırılmasının zəruriliyini vurğulayıb və Almaniyanın daimi sülh üçün iki dövlətli həll prinsipinə sadiq qaldığını qeyd edib.

Alman nazir həmçinin ölkəsinin İsrailin İordan çayının qərb sahilində torpaqları ilhaq etmək planlarına qarşı olduğunu bildirib.

Xatırladaq ki, İsrail ordusu Qəzza zolağında yanvarın 19-da qüvvəyə minmiş atəşkəsdən sonra, martın 18-də səhər saatlarında yenidən intensiv hücumlara başlayıb.

İsrailin 2023-cü il oktyabrın 7-dən bəri Qəzzaya təşkil etdiyi hücumlarda azı 63 min 746 fələstinli həlak olub, 161 min 245 nəfər yaralanıb. Atəşkəsin pozulduğu 18 mart tarixindən etibarən isə İsrailin hücumları nəticəsində 11 min 615 nəfər həyatını itirib, 49 min 204 nəfər yaralanıb.

Bundan əlavə, 27 may tarixindən bəri ABŞ və İsrailin dəstəyi ilə qurulan “Qəzza Humanitar Yardım Fondu”nun paylama məntəqələrində baş verən hücumlarda ən azı 2 min 339 fələstinli öldürülüb, 17 min 70 nəfər yaralanıb.

Hazırda İsrail ordusu Qəzza zolağında işğalı genişləndirməyi və qalıcı hala gətirməyi hədəfləyən yeni hücum planını icra edir. Baş nazir Benyamin Netanyahunun açıqlamasına görə, məqsəd Qəzzanın tam işğalıdır.