BAKI, AzerVoice, Səməd Əyyubov
Böyük Britaniyanın baş naziri Kir Starmer bildirib ki, Qəzza zolağındakı vəziyyət dəhşətlidir və bölgədə yaranan aclıq insan tərəfindən yaradılmış süni aclıqdır.
AzerVoice xəbər verir ki, Starmer bu fikirləri parlamentdə çıxış edərkən səsləndirib.
O qeyd edib ki, Qəzzadakı hadisələrlə bağlı dünya liderləri ilə danışıqlar aparır və atəşkəsin əldə olunması, bölgəyə humanitar yardımın çatdırılması və girovların azad olunması istiqamətində səylər göstərir. Baş nazir həmçinin iki dövlətli həll yoluna aparacaq sülh planı üzərində də işlədiklərini vurğulayıb.
Starmerin sözlərinə görə, İsrail humanitar təşkilatlara həyati vacib yardımları Qəzzaya çatdırmağa icazə verməlidir. O, İsrail hökumətini yardımların qarşısını almaqda ittiham edərək bildirib ki, bu səbəbdən “insan tərəfindən yaradılmış süni aclıq” elan olunub. Baş nazir əlavə edib ki, tələb olunan miqdarda yardımın bölgəyə çatdırılması üçün yeganə davamlı yol quru sərhəd-keçid məntəqələridir.
Qeyd edək ki, Avropa İttifaqının xarici siyasət üzrə komissarı Ursula fon der Lyayen də Avropanın Qəzzada baş verənlər qarşısında uğursuzluğunu etiraf edib.
“Geosiyasi gücümüzü hadisələrin gedişatını dəyişmək üçün istifadə edə bilmədik, çünki birliyimiz yoxdur” - deyə, o bildirib.
Onun sözlərinə görə, Qəzzadakı humanitar böhran Avropanın öz dəyərlərinə sadiqliyinin ciddi sınağına çevrilib.
İspaniyanın baş naziri Pedro Sançes isə Aİ-nin Qəzzada baş verənlərlə bağlı mövqeyini kəskin tənqid edib və reaksiyanı “uğursuz” adlandırıb. O bildirib ki, Avropanın bu zəifliyi Qərbin qlobal mövqeyinə və etibarlılığına zərbə vurur, Qəzza və Ukrayna məsələlərində isə ikili standartları açıq şəkildə nümayiş etdirir.
Sançes İsrailin fələstin torpaqlarına hücumunu XXI əsrin beynəlxalq münasibətlərində “ən qaranlıq səhifələrdən biri” kimi dəyərləndirib. O, Avropa ölkələrinin İsrailə təzyiq məsələsində parçalanmış vəziyyətdə olduqlarını qeyd edərək bunu “qəbuledilməz” adlandırıb.
İspaniya baş naziri həmçinin ölkəsinin Fələstin dövlətini tanımaqda öncül olduğunu xatırladaraq, digər Avropa dövlətlərinin də bu yolda addım atmasından məmnunluğunu ifadə edib. Bununla belə, o, ümumi Avropa mövqeyini “zəif və yetərsiz” adlandırıb.
Sançes əlavə edib ki, ABŞ prezidenti Donald Trampın siyasəti İkinci Dünya Müharibəsindən sonra formalaşmış beynəlxalq nizamı dağıdır. Onun sözlərinə görə, ABŞ-ın Ümumdünya Səhiyyə Təşkilatı kimi qurumlardan çıxması Avropa və Böyük Britaniyaya qlobal liderliklərini təsdiqləmək üçün yeni imkan yarada bilər.
