BAKI,AzerVoice

Fələstin Prezidenti Mahmud Abbas İsrailin məqsədinin “Fələstini tamamilə məhv etmək” olduğunu bildirib.

AzerVoice xəbər verir ki, o vurğulayıb ki, Fələstin Muxtariyyəti Qəzza zolağının idarəsində ərəb və ya beynəlxalq tərəfdaşlığa qarşı deyil.

“Ən azı 200 min qurban – ölən və yaralanan var. İsrail öz siyasətini davam etdirir, dünya isə sadəcə pisləməklə kifayətlənir”, – deyə Abbas “Əl-Ərəbiyyə” və “Əl-Hədəs” telekanallarına müsahibəsində bildirib.

Onun sözlərinə görə, Qəzza real aclıq içindədir.

“Orada insanlar ya müharibədən, ya da aclıqdan ölür. Aclıqdan ölənlərin sayı, qətlə yetirilənlərin sayından çoxdur”-deyə o bildirib.

Abbas beynəlxalq ictimaiyyəti tənqid edərək deyib ki, “Fələstinlə bağlı 1000-dən çox BMT qərarı var, amma heç biri icra olunmayıb”.

Prezident İsrail Baş naziri Benyamin Netanyahunu “fələstinliləri məhv etməkdə qərarlı olmaqda” ittiham edib.

“Netanyahu yalnız hakimiyyətdə qalmaq və məhkəmə qarşısına çıxmamaq üçün bu siyasəti davam etdirir. O, fələstin dövlətinin yaranmasını istəmir. Biz Qəzzanı idarə etməyə hazırıq, imkanlarımız da var. İdarədə ərəb və ya beynəlxalq tərəfdaşlıq olmasına da etiraz etmirik”-deyə Abbas qeyd edib.

O əlavə edib ki, 149 ölkə Fələstin dövlətini tanıyıb və bir çox ölkə də tanımağa hazırdır.

“Yaxın vaxtlarda BMT-yə üzv olmaq üçün müraciət edəcəyik”-deyə Abbas müsahibəsində vurğulayıb.

Mahmud Abbas xatırladıb ki, Oslo sazişi fələstinlilərin vətənə dönüşünə imkan yaratdı və “heç bir güzəşt verilmədi”. Onun sözlərinə görə, Netanyahu sazişi dondurmaq istəsə də, bu, ikitərəfli müqavilədir və birtərəfli ləğv edilə bilməz.

Abbas həmçinin HƏMAS-a müraciət edib:

“Biz bir dövlətik, bir xalqıq. HƏMAS dövlət vahidliyi və vahid silah prinsipinə əməl etməlidir. Mən HƏMAS-la dəfələrlə danışdım, amma nəticə olmadı.”