BAKI, AzerVoice

Neapolda keçirilən 75-ci Milli Liturgiya Həftəsinin açılışında çıxış edən Vatikan Dövlət katibi Kardinal Pietro Parolin, Qəzzada və Ukraynada davam edən münaqişələrin yaratdığı insan faciəsinə diqqət çəkib, “bütün ümidsizliyə rəğmən ümid etməyin vacibliyini” vurğulayıb.

AzerVoice xəbər verir ki, Kardinal Parolin Qəzzadakı vəziyyəti pisləyərək bildirib: “Qəzzada baş verənlərə görə dəhşətə gəlirik, hadisələri pisləməkdə yekdil fikir var.” O, xüsusilə Xan Yunisdəki Nasser Xəstəxanasına edilən İsrail hücumuna toxunub. Həmin hücum nəticəsində aralarında beş jurnalistin də olduğu 20 nəfərin həlak olduğunu xatırladan kardinal, bunun “heç bir məna daşımadığını” vurğulayıb. O əlavə edib ki, Qəzzada vəziyyət getdikcə daha da çətinləşir, humanitar baxımdan isə təhlükəli həddə çatır: “Həll üçün heç bir yol görünmür, nəticələrini isə hər gün görürük.”

Ukrayna ilə bağlı çıxışında Parolin qeyd edib ki, nəzəri baxımdan çoxsaylı həll yolları və sülhə aparan cığırlar mövcuddur, lakin bunların həyata keçirilməsi üçün “çoxlu siyasətə” ehtiyac var: “Bu da qəlbin hazır olmasını tələb edir.”

Kardinal həmçinin Papa Fransiskin elan etdiyi və ümid mövzusuna həsr olunmuş Yubiley ilinə diqqət çəkib. O, Yubileyin məqsədini “ümidi yenidən qazanmaq anı” kimi dəyərləndirib: “Xüsusən beynəlxalq səviyyədə ümid üçün çox səbəbin olmadığı bir zamanda, bu bütün ümidsizliyə rəğmən bir ümiddir.”

Dövlət katibi çıxışını belə yekunlaşdırıb: “Son günlər bir daha göstərdi ki, münaqişə vəziyyətlərində sülh yollarını işə salmaq çox çətindir. Amma biz təslim olmamalıyıq, əksinə, sülh və barışıq üçün işləməyə davam etməliyik.”