BAKI, AzerVoice, Nərmin Ağayeva

İsrailin Qəzzadakı xəstəxanaya hücumu qəbuledilməzdir.

AzerVoice xəbər verir ki, Almaniya kansleri Fridrix Mertz İsrailin Qəzzanın cənubundakı Nasser xəstəxanasına hücumunu kəskin şəkildə tənqid edərək, bunu “qəbuledilməz” adlandırıb. O, xüsusilə mülki itkilərin, tibbi personalın və jurnalistlərin hədəfə düşməsini İsrailin əməliyyatlarının legitimliyinə kölgə salan ciddi problem kimi qiymətləndirib.

Mertz Belçika baş naziri Bart De Vever ilə Berlində keçirdiyi mətbuat konfransında İsrailin genişlənən hərbi əməliyyatına qarşı olduğunu bildirib. Onun sözlərinə görə, baş verənlər mülki əhali, xəstəxana işçiləri və jurnalistlər arasında qəbuledilməz itkilərə səbəb olub.

Qeyd edək ki, İsrail ordusu avqustun 25-də Qəzzanın Xan Yunis şəhərində yerləşən Nasser xəstəxanasına iki hücum həyata keçirib. Qəzza Səhiyyə Nazirliyinin məlumatına görə, hücum nəticəsində 20 nəfər, o cümlədən 5 jurnalist və 5 tibb işçisi həyatını itirib. İsrail ordusu hücumlara görə məsuliyyəti üzərinə götürsə də, “birbaşa jurnalistləri hədəf almadığını” bildirib və araşdırma başladığını açıqlayıb.