BAKI, AzerVoice, Səməd Əyyubov
Malayziyanın baş naziri Ənvər İbrahim Qəzza xalqına dəstək məqsədilə yeni yardım paketi elan edib.
AzerVoice xəbər verir ki, Ənvər İbrahim Malayziyanın Qəzzadakı fələstinlilərə təxminən 23,6 milyon ABŞ dolları dəyərində əlavə yardım göstərəcəyini açıqlayıb. Baş nazir həmçinin ölkədə fəaliyyət göstərən iri şirkətləri Qəzzanın yenidən qurulmasına dəstək verməyə çağırıb.
Ənvər İbrahim çıxışında Qəzzada minlərlə qadın və uşağın aclıqla üz-üzə qaldığını vurğulayaraq, İsrailin baş naziri Benyamin Netanyahunu zalımlıqda ittiham edib. O, həmçinin aclığın bir silah kimi istifadə olunduğunu qeyd edərək beynəlxalq ictimaiyyəti Fələstin xalqına qarşı zülmün dayandırılması üçün İsrailə təzyiq göstərməyə çağırıb.
Hazırda Qəzza zolağında humanitar böhran daha da dərinləşir, bölgədə qida çatışmazlığı və təhlükəsizlik problemi kəskin olaraq qalır.
