BAKI, AzerVoice, Nərmin Ağayeva

ABŞ-ın Karib dənizinə hərbi gəmilər göndərməsindən sonra Venesuela milli səfərbərliyə hazırlaşır.

AzerVoice xəbər verir ki, Venesuela prezidenti Nikolas Maduro paytaxt Karakasda keçirilən hərbi mərasimdə çıxış edərək, ölkəsinin xarici təhdidlərə boyun əyməyəcəyini bildirib. Dövlət başçısı şənbə və ya bazar günü "Milli Suverenlik və Sülh Planı" çərçivəsində milli səfərbərlik elan edəcəyini açıqlayıb.

Maduro bütün milis qüvvələrini, ehtiyatda olan əsgərləri və könüllü vətəndaşları orduya qoşulmağa çağıraraq, “Venesuela sülh istəyir, lakin ölkəmizi müdafiə etməyə də tam hazırdır” - deyə bildirib. Prezident həmçinin “Cuadrantes de Paz” (Sülh meydanları) təşəbbüsü ilə təhlükəsizlik qüvvələrinin 5336 bölgədə yerləşdirildiyini vurğulayıb.

Maduro çıxışında ABŞ-ı imperialist siyasətdə günahlandıraraq, Venesuelanın bütün təzyiqlərə qarşı müqavimət göstərəcəyini bildirib. Onun sözlərinə görə, ABŞ-ın bölgədə artan hərbi varlığına qarşı milli müdafiə tədbirləri gücləndiriləcək.

Qeyd edək ki, ABŞ son günlər Venesuela yaxınlığında yerləşən Karib dənizinə üç hərbi gəmi göndərmək barədə qərar qəbul edib. Bu addım iki ölkə arasında gərginliyi artırıb.