BAKI, AzerVoice, Nərmin Ağayeva
İsrail ordusunun Qəzzaya genişmiqyaslı hücum planı müzakirə olunur.
AzerVoice xəbər verir ki, İsrailin Baş Qərargah rəisi Eyal Zamir Qəzza şəhərinin hərtərəfli işğalı üçün plan hazırlayıb. Plana əsasən, təxminən 100 min əsgərin iştirakı ilə hücum həyata keçiriləcək və qoşunlara havadan dəstək veriləcək. Məqsəd əvvəlcə şəhəri mühasirəyə almaq, daha sonra isə tamamilə ələ keçirməkdir.
İsrail mətbuatının yazdığına görə, Zamir planın mümkünlüyünü qiymətləndirmək üçün Qəzza zolağına da səfər edib. Artıq ordunun hücumlarını intensivləşdirdiyi şəhərdən mülki əhalinin çıxmağa başladığı bildirilir.
Qeyd edək ki, paralel olaraq atəşkəs səyləri də davam edir. İsrail və Ərəb KİV-lərinin məlumatına görə, HƏMAS-a girovların mərhələli azad olunması müqabilində Qəzzaya mərhələli müdaxilə planı təqdim edilib. Qətərin baş naziri və xarici işlər naziri Məhəmməd əl-Tani bu məqsədlə Qahirədə Misirin atəşkəs təşəbbüsünü müzakirə edəcək.