BAKI, AzerVoice, Səməd Əyyubov
Fransanın paytaxtı Parisdə Fələstinə dəstək və İsrail hökumətinin Qəzza zolağında hərbi əməliyyatları genişləndirmə planlarına etiraz məqsədilə aksiya keçirilib.
AzerVoice-un məlumatına görə, aksiyada yüzlərlə insan iştirak edib və tədbir insidentsiz başa çatıb.
Etirazçılar Bastiliya meydanında toplaşaraq “Fələstin azad olsun”, “Qəzzanı müdafiə edin” kimi şüarlar səsləndirib və üzərində “Soyqırımı dayandırın”, “İsrailə silah tədarükünə təcili embarqo”, “Atəşi dayandırın” yazılı plakatlar qaldırıblar. Bir çox iştirakçı Fələstin bayraqları gətirib.
Qeyd edək ki, İsrail Təhlükəsizlik Kabineti Qəzza şəhərinin işğalı ilə bağlı yeni planı təsdiqləyib. Bu qərar bölgədə gərginliyi daha da artırıb və beynəlxalq aləmdə, o cümlədən Türkiyə və Almaniyada kəskin reaksiyalara səbəb olub.