BAKI, AzerVoice, Nailə Babazadə

İsrail parlamentində (Knesset) müxalifətdə təmsil olunan Ortaq Siyahı Partiyasının millət vəkili Ofer Kassif, Qəzza zolağında İsrailin soyqırım törətdiyinə dair açıqlamanı səsləndirdiyi üçün parlament kürsüsündən zorla uzaqlaşdırılıb.

AzerVoice xəbər verir ki, hadisə, Kassifin dünən axşam parlamentdə etdiyi çıxış zamanı baş verib. O, çıxışının görüntüsünü sosial media hesabında paylaşaraq baş verənlərə sərt reaksiya verib.

Kassif çıxışında məşhur israilli yazıçı David Qrossmanın İtaliyanın La Repubblica qəzetinə verdiyi müsahibədən sitatlar səsləndirib. Qrossman müsahibəsində Qəzzada baş verənləri "soyqırım" kimi qiymətləndirərək bunları demişdi:

“İllər boyu ‘soyqırım’ ifadəsini işlətməkdən çəkinirdim. Amma Qəzzada gördüklərim və eşitdiklərim qarşısında artıq susa bilmərəm. Mən İsraili soyqırım törədən bir dövlət kimi tanımaqdan hər zaman çəkinmişəm. Amma indi, dərin ağrı və qırıq bir qəlblə deyə bilərəm ki, bu, Qəzza zolağında gözlərimin qarşısında baş verir.”

Bu sözləri parlamentdə səsləndirməyə başlayan Kassifə dərhal Knessetdəki digər israilli deputatlar tərəfindən sərt etirazlar gəlib. Nəticədə, o, parlament mühafizəçiləri tərəfindən zorla kürsüdən endirilib.

Sosial media paylaşımında Kassif, hadisəyə sərt münasibət bildirərək İsrail parlamentində tənqidə, hətta yazılı mənbədən sitat gətirməyə belə icazə verilmədiyini vurğulayıb.

“Parlamentdə fikir azadlığına yer yoxdur. Hətta bir yazıçının sözlərini oxumaq belə yasaqlanır. Bu, demokratiya deyil”, – deyə o paylaşımında qeyd edib.

Qeyd edək ki, israilli yazar David Qrossman ötən həftə La Repubblica qəzetinə verdiyi müsahibə ilə beynəlxalq ictimaiyyətin diqqətini çəkmişdi. O, Qəzzada baş verən hadisələri ilk dəfə olaraq açıq şəkildə “soyqırım” adlandırmış, bu ifadəni işlətməməyə çalışdığını, lakin artıq susa bilmədiyini bildirmişdi.