BAKI,AzerVoice, Nailə Babazadə

Səudiyyə Ərəbistanı və Birləşmiş Ərəb Əmirliklərindən ibarət birgə heyət təcili missiya ilə Yəmənin müvəqqəti paytaxtı Ədənə gəlib. Heyətin əsas məqsədi Cənub Keçid Şurasının (STC) qüvvələrinin Hədrəməvt və Əl-Məhra vilayətlərindən çıxarılması və onların Səudiyyə rəhbərliyindəki Ərəb Koalisiyasının birbaşa nəzarəti altında əvvəlki təhlükəsizlik qüvvələrinin tabeliyinə qaytarılması üçün icra mexanizmlərinin hazırlanmasıdır.

AzerVoice xəbər verir ki, məlumata görə, heyət gərginlikdən əvvəl mövcud olan vəziyyətin bərpa edilməsi üçün mövqelərin Milli Qalxan Qüvvələrinə təhvil verilməsi ilə bağlı məsələləri müzakirə edəcək.

Bu addım Səudiyyə Ərəbistanının Yəmənin şərqində yaranmış gərginliyin aradan qaldırılması istiqamətində apardığı intensiv səylərin tərkib hissəsi kimi qiymətləndirilir. Ərəb Koalisiyası Hədrəməvtdə STC tərəfindən həyata keçirilən birtərəfli tədbirləri rədd edir və bu addımları yeni status-kvonun yaradılması, eləcə də vilayətin sülh və sabitliyini təhdid edən daxili qarşıdurmaya sürüklənməsi cəhdi kimi dəyərləndirir.

Mənbələrin “Əş-Şərq əl-Əvsət” qəzetinə bildirdiyinə görə, birgə heyətin Ədənə gəlişi Ər-Riyadın Yəmənin qanuni institutları daxilində etimadsızlıq yarada və ya parçalanmanı dərinləşdirə biləcək istənilən fəaliyyəti qəti şəkildə qəbul etmədiyini bir daha nümayiş etdirir.