BAKI, AzerVoice
Qəzzada saxlanılan girovların azad olunması üçün səylərimizi davam etdiririk.
AzerVoice xəbər verir ki, bunu İsrailin Baş naziri Benyamin Netanyahu deyib.
“Yeni girovların azad olunması ilə bağlı məsləhətləşməni biraz əvvəl başa vurdum. Dünən və ondan əvvəlki gün də görüşlərimiz olub. İsrail nümayəndə heyəti Qətərdən qayıtdıqdan sonra səylərimizi bir an belə dayandırmamışıq. Biz təslim olmayacağıq və əlimizdən gələn hər şeyi etməyə davam edəcəyik. Girovların geri qaytarılmasına sadiqik” – deyə, Netanyahu bildirib.
O əlavə edib ki, Qəzza ilə bağlı razılaşmanın əldə olunmasına ciddi bir maneə var.
"Qəzza ilə bağlı razılaşmaya nail olmaq yolunda böyük bir maneə var və bunu hər kəs bilir – bu, HƏMAS-dır” - deyə, o qeyd edib.
Baş nazirin sözlərinə görə, HƏMAS vasitəçilər tərəfindən irəli sürülən təklifləri "israrlı şəkildə rədd edir”.
“Faktları bilən hər kəs, vasitəçilər də daxil olmaqla, bunu yaxşı bilir” – deyə, Netanyahu vurğulayıb.
Qeyd edək ki, ötən ilin yanvarında əldə olunan atəşkəs rejiminə baxmayaraq, mart ayında İsrail ordusu Qəzzada hərbi əməliyyatları yenidən bərpa edib. Qətər, Misir və ABŞ-ın vasitəçiliyi ilə keçirilən bir neçə danışıqlar raundunda tərəflər yeni razılaşma şərtlərində razılığa gələ bilməyiblər.