BAKI, AzerVoice

Diplomatik mənbələr, İsrailin "Yedioth Ahronoth" qəzetinə bildiriblər ki, Baş nazir Benyamin Netanyahu İsrail ordusunun Qəzza Zolağının bəzi bölgələrindən geri çəkilməsi məsələsində daha mülayim mövqe sərgiləyib və atəşkəsdən sonra Moraq Dəhlizində hərbi mövcudluğunu davam etdirmək tələbindən imtina edib.

AzerVoice-un məlumatına görə, Qəzzanın cənubundakı Rəfah və Xan Yunis şəhərlərini ayıran Moraq Dəhlizindən geri çəkilməklə yanaşı, İsrail ordusunun Qəzza Zolağının kənarında 2 kilometrə qədər genişlənən və "təhlükəsizlik zolağı" adlandırılan bölgənin bir neçə yüz metrə endirilərək yeni mövqelərə çəkilməyə hazırlaşdığı irəli sürülüb.

İsrail dövlət televiziyası KAN isə, İsrail ordusunun Qəzzanı tərk edəcəyini əks etdirən xəritəsi və təqvimi məsələsində razılaşmanın hələ də əldə olunmadığını və vasitəçilərin İsrailin yeni təklifini HƏMAS-a təqdim etdiyini bildirmişdi.

İsrailin təqdim etdiyi yeni təklifdə həm Moraq Dəhlizindən geri çəkilmə, həm də təhlükəsizlik zolağının daraldılması məsələlərinin yer aldığı iddia olunub.