BAKI, AzerVoice

İsrailin Baş naziri Benyamin Netanyahu və müdafiə naziri İsrael Kats orduya Suriyanın cənubunda yerləşən Əs-Süveyda şəhərinə daxil olan Suriya təhlükəsizlik qüvvələrinə qarşı hücum əmri verdiklərini açıqlayıblar.

AzerVoice xəbər verir ki, onların birgə bəyanatı baş nazirin dəftərxanası tərəfindən yayımlanıb.

“Baş nazir Benyamin Netanyahu və müdafiə naziri İsrael Kats İsrail Müdafiə Ordusuna (SAXAL) Əs-Süveyda bölgəsinə druzlara qarşı əməliyyat üçün yeridilən Suriyaya məxsus qüvvə və silahlara dərhal hücum etməyi əmr ediblər” – deyə, bəyanatda qeyd olunub.

Netanyahu və Kats bildiriblər ki, bu addım, İsrailin təhlükə doğuran hərbi qüvvələrin Suriyanın cənubuna yerləşdirilməsinin qarşısını almağı hədəfləyən "demilitarizasiya siyasətinə" ziddir. Onlar əlavə ediblər ki, İsrail “Suriyanın druzlara zərər verməsinin qarşısını almağa çalışır” və "Suriya ilə sərhəd boyunca demilitarizə olunmuş bölgənin yaradılması" üzərində işləyir.

İsrail Müdafiə Ordusu da bildirib ki, hücumlar bazar ertəsi axşamı Suriya qüvvələrinin Əs-Süveyda istiqamətində hərəkətinin aşkarlanmasından sonra həyata keçirilib. Ordunun açıqlamasına görə, SAXAL bir neçə döyüş texnikasına, o cümlədən tanklara, reaktiv yaylım atəş sistemlərinə və onların istifadə etdiyi yolların giriş-çıxışına zərbələr endirib ki, bu texnikaların bölgəyə çatmasına mane olsun. Ordudan bildirilib ki, vəziyyət nəzarət altındadır və müxtəlif ssenarilərə qarşı hazırlıq vəziyyəti qorunur.

İsrail hakimiyyəti, ötən ilin sonlarında Dəməşqdə baş verən hakimiyyət dəyişikliyindən sonra dəfələrlə Suriyadakı druzlara dəstəyini ifadə edib və zərurət yarandığı təqdirdə onları özünümüdafiə istiqamətində dəstəkləməyə hazır olduğunu bəyan edib.

Qeyd edək ki, druzlar ərəb dilli, dini baxımdan xüsusi qapalı sistemə malik etno-konfessional bir azlıqdır. Onlar əsasən Suriya, Livan, İsrail və İordaniyada yaşayırlar. Suriyada təxminən 700 min druz var və bu, kürdlər və ələvilərdən sonra ölkənin üçüncü ən böyük dini-etnik azlığı sayılır.