BAKI, AzerVoice
İsrailin Qəzza zolağında tətbiq etdiyi mühasirə nəticəsində aclıqdan ölən fələstinli uşaqların sayı 68-ə çatıb.
AzerVoice xəbər verir ki, bu barədə Qətərin "Əl-Cəzirə" telekanalı məlumat yayıb.
Eyni zamanda, mühasirə zamanı yeddi aylıq bir körpənin müalicə olunduğu halda aclıqdan həyatını itirdiyi bildirilib.
Qəzza hakimiyyət orqanları ötən həftənin sonunda açıqlama verərək, İsrailin Qəzza zolağına qarşı başladığı müharibədən bəri ən azı 67 uşağın aclıq səbəbilə həlak olduğunu bildirmişdi.
Birləşmiş Millətlər Təşkilatının Uşaq Fondu (UNICEF) isə iyun ayında Qəzzada 5 800-dən çox uşağın qidalanma çatışmazlığına məruz qaldığını, onlardan mindən çoxunun isə ağır vəziyyətdə olduğunu açıqlayıb.
"Bu, sadəcə qida böhranı deyil. Bu, uşaqların sağ qalması üçün fövqəladə vəziyyətdir" - deyə, UNICEF-in bəyanatında bildirilib.
UNICEF, BMT-nin Dünya Qida Proqramı, Ümumdünya Səhiyyə Təşkilatı və Humanitar Əlaqələndirmə İdarəsi (OCHA) də daxil olmaqla 7 beynəlxalq təşkilatla birlikdə ortaq bəyanat verərək xəbərdarlıq ediblər ki, İsrailin Qəzzaya yanacaq tədarükünə tətbiq etdiyi qadağa nəticəsində xəstəxanalar bağlana bilər, o cümlədən təcili yardım maşınları, sanitariya xidmətləri və su təchizatı sistemləri də fəaliyyətini dayandıra bilər.
"Bu, tibbi xidmətlərin, təmiz suyun və yardım çatdırılmasının olmaması deməkdir. Həyatların xilas edilməsi üçün lazım olan əməliyyatların davam etdirilməsi məqsədilə Qəzzaya kifayət qədər yanacağın fasiləsiz şəkildə daxil olmasına icazə verilməlidir" - deyə, bəyanatda qeyd olunub.
