BAKI, AzerVoice
İsrail Dohadakı vasitəçilərə yeni xəritə təqdim edib. Bu xəritələrdə təklif olunan 60 günlük atəşkəs dövrü ərzində İsrail ordusunun Qəzza zolağından qismən geri çəkilməsi əks olunub.
AzerVoice xəbər verir ki, bu barədə "Times of Israel" qəzeti adı açıqlanmayan mənbələrə istinadla məlumat yayıb.
Məlumata görə, bu addım ABŞ-ın İsrailin Qəzzadakı hərbi mövcudiyyətini məhdudlaşdırmaq üçün göstərdiyi təzyiqlərdən sonra atılıb.
Mənbələr qeyd ediblər ki, HƏMAS əvvəlki qismən geri çəkilmə planını rədd edib və bu məsələ danışıqlardakı əsas ixtilaf nöqtəsinə çevrilib.
ABŞ-ın Yaxın Şərq üzrə nümayəndəsi Stiven Uitkofd dünən bildirib ki, bu həftə razılaşmaya nail olunacağına ümid edir.
Mənbənin bildirdiyinə görə, hələlik fələstinli və israilli əsirlərin adlarının müəyyən edilməsi məsələsi danışıqlarda gündəmə gətirilməyib. HƏMAS əvvəlcə əsas məsələlərin həllini tələb edir.
Digər tərəfdən, ABŞ təklif olunan atəşkəs mətnində İsrailə texniki olaraq 60 günlük atəşkəsdən sonra müharibəni bərpa etməyə imkan verən bir “bənd” saxlamağı planlaşdırır. Amma Prezident Donald Trampın administrasiyası vasitəçilərə bildirib ki, İsrailin bu hüquqdan istifadə etməsinə icazə vermək niyyətində deyil.
