BAKI, AzerVoice
Almaniyanın qərbində, Şimali Reyn-Vestfaliya federal əyalətində yerləşən Essen şəhərində terror aktı hazırlamaqda şübhəli bilinən 27 yaşlı Bosniya vətəndaşı saxlanılıb.
AzerVoice xəbər verir ki, bu barədə “Bild” qəzeti polisə istinadla məlumat yayıb.
Məlumata görə, istintaq bir neçə həftədir aparılırdı və dələduzluq, eləcə də terrorizmin maliyyələşdirilməsi ilə bağlı şübhələri əhatə edirdi.
“Essen Polis İdarəsi tərəfindən Düsseldorf Prokurorluğunun rəhbərliyi altında aparılan araşdırma nəticəsində, dələduzluqla yanaşı, əldə edilən gəlirlərin islamçı motivli terror aktının maliyyələşdirilməsi üçün istifadə edilməsi ehtimalı ortaya çıxıb” – deyə, qəzet polis nümayəndəsinin sözlərini sitat gətirib.
Ehtimal olunan hücumun, yəqin ki, odlu silahdan istifadə edilməklə həyata keçirilməsi planlaşdırılan terror aktının qarşısını almaq və əlavə məlumatlar əldə etmək məqsədilə altı fərqli ünvanda axtarışlar aparılıb. Terror aktı hazırlamaqda əsas şübhəli şəxs və onunla əlaqəli ikinci şübhəli Essen və Dortmund şəhərlərində yaşayır. Axtarışlar digər əlaqəli şəxslərin evlərində də aparılıb, lakin onlar hələlik yalnız şahid qismində dindirilib.
Qəzetin yazdığına görə, terror aktının konkret harada və necə həyata keçirilməsi planlaşdırıldığı hələlik məlum deyil.
