BAKI, AzerVoice
BRİKS ölkələrinin liderləri bu gün Braziliyanın Rio-de-Janeyro şəhərində keçirilən sammitdə Qəzza zolağında 22 aydır davam edən müharibəyə son qoymaq üçün qeyd-şərtsiz atəşkəsə çağırış ediblər.
AzerVoice xəbər verir ki, bu barədə təşkilata üzv ölkələrin yaydığı birgə bəyanatda deyilir.
“Bütün tərəfləri dərhal, daimi və qeyd-şərtsiz atəşkəsə, İsrail qüvvələrinin Qəzza zolağından çıxmasına yönəlmiş danışıqlarda səmimiyyətlə iştirak etməyə çağırırıq” - deyə, bəyanatda qeyd olunub.
Xatırladaq ki, müharibə 7 oktyabr 2023-cü ildə HƏMAS-ın İsrailə misilsiz hücumu ilə başlayıb. Həmin hücum nəticəsində 1 219 nəfər həlak olub. İsrailin cavab olaraq həyata keçirdiyi hərbi əməliyyatları nəticəsində isə HƏMAS-ın idarə etdiyi Qəzza Səhiyyə Nazirliyinin məlumatına görə, 57 418 fələstinli həlak olub, onların əksəriyyəti mülki şəxslər olub. BMT bu rəqəmləri etibarlı hesab edir.
Qeyd edək ki, atəşkəsə dair yeni raund danışıqların yaxın günlərdə Dohada keçirilməsi planlaşdırılır.
