BAKI, AzerVoice

İsrail nümayəndə heyəti, Qəzza zolağında atəşkəs razılaşmasına və orada saxlanılan girovların azad edilməsinə dair danışıqlar aparmaq məqsədilə Qətərin paytaxtı Dohaya gəlib.

AzerVoice xəbər verir ki, bu barədə Qətərin "Al Araby" telekanalı məlumat yayıb.

Bundan əvvəl bildirilmişdi ki, İsrail hökuməti Qəzza ilə bağlı məsləhətləşmələr aparmaq üçün danışıqlar heyətini Dohaya göndərmək qərarına gəlib.

Qeyd edək ki, bu il yanvar ayında elan edilmiş atəşkəs rejimindən sonra, mart ayında İsrail Müdafiə Ordusu Qəzza zolağında hərbi əməliyyatlarını bərpa etmişdi. Qətər, Misir və ABŞ-ın vasitəçiliyi ilə bir neçə danışıqlar raundu keçirilsə də, tərəflər yeni razılaşmanın şərtləri üzrə ortaq mövqeyə gələ bilməmişdi.

ABŞ prezidenti Donald Tramp iyulun 2-də bəyan etmişdi ki, İsrail 60 günlük atəşkəslə razılaşıb. Bu müddət ərzində tərəflər Qəzzadakı münaqişənin dayandırılması üçün danışıqlar aparacaqlar.

İyulun 4-də isə HƏMAS, digər fələstinli qruplarla məsləhətləşmələrdən sonra vasitəçilərə Qəzza zolağında atəşkəs təklifinə müsbət cavab verdiyini açıqlamışdı.