BAKI, AzerVoice

Atəşkəs təklifini müzakirə edirik, yekun qərar veriləcək.

AzerVoice xəbər verir ki, HƏMAS Qəzza zolağında atəşkəs təklifi ilə bağlı fələstinli qruplarla məsləhətləşmələr apardığını və yekun qərarın bu danışıqlardan sonra veriləcəyini bəyan edib.

Hərəkat, vasitəçilərin təqdim etdiyi atəşkəs şərtlərini dəyərləndirməyə davam etdiyini bildirir.

Açıqlamada qeyd olunub ki, HƏMAS-ın məqsədi İsrailin hücumlarını dayandırmaq və Qəzzaya humanitar yardımların sərbəst keçidini təmin etməkdir. "Yekun qərar vasitəçilərə təqdim ediləcək və rəsmi şəkildə elan olunacaq", – deyə bəyanatda vurğulanıb.

Digər tərəfdən, İsrail Baş naziri Benyamin Netanyahu Qəzza sərhədindəki Nir Oz qəsəbəsini ziyarət edib və atəşkəs və əsir mübadiləsi razılaşmasının yaxın zamanda açıqlanacağına dair siqnallar verib.

İsrailin xarici işlər naziri Gideon Saar da danışıqlarda irəliləyiş olduğunu bildirərək, "Dolayı danışıqlara başlamağa hazırıq", – deyə qeyd edib.

Xatırladaq ki, ABŞ prezidenti Donald Tramp 60 günlük atəşkəs üçün İsrailin bütün şərtləri qəbul etdiyini açıqlayıb. Trampın iyulun 7-də İsrail Baş naziri ilə görüşündə bu razılaşmanın rəsmi elan olunacağı gözlənilir.

Qeyd edək ki, atəşkəs danışıqlarında Qətər və Misir vasitəçi rolunu oynayır və HƏMAS-a “son təklif” təqdim ediblər. Fələstin mənbələri HƏMAS-ın razılaşmaya müsbət yanaşdığını bildirir.