BAKI, AzerVoice
İran hakimiyyətinin Atom Enerjisi üzrə Beynəlxalq Agentliyi (AEBA) ilə əməkdaşlığı dayandırmaq qərarı narahatlıq doğurur.
AzerVoice xəbər verir ki, bunu BMT baş katibinin rəsmi nümayəndəsi Stefan Düjarrik keçirdiyi brifinqdə deyib.
“O rəsmi qərarla tanış olduq və bu, şübhəsiz ki, narahatlıq doğurur. Hesab edirəm ki, Baş katib Antonio Quterreş İranı AEBA ilə əməkdaşlığa çağırmaqda daim ardıcıl mövqe sərgiləyib” – deyə, o bildirib.
Düjarrik əlavə edib ki, hələlik İranın BMT-yə bu qərarla bağlı rəsmi bildiriş göndərib-göndərmədiyi barədə məlumat yoxdur.
Xatırladaq ki, çərşənbə günü İran prezidenti Məsud Pezeşkian Tehranla AEBA arasındakı əməkdaşlığın dayandırılmasına dair qanunu imzalayıb. Prezidentin imzası ilə bu qanun qüvvəyə minmiş sayılır və icrası məcburidir.
