BAKI, AzerVoice
Qəzzada yemək axtaran insanlar ölümə layiq deyil.
AzerVoice xəbər verir ki, BMT-nin baş
katibi Antonio Quterreş Qəzzada həyata keçirilən yeni humanitar
yardım sistemi ilə bağlı ciddi narahatlığını ifadə edib.
O bildirib ki, ərzaq tapmaq üçün yola çıxan mülki şəxslərin
öldürülməsi qəbuledilməzdir və bu cəza “ölüm” olmamalıdır.
Quterreş bildirib ki, bölgədə yardımların dağıdılması xaotik və təhlükəli şəkildə aparılır, bunun nəticəsində isə günahsız insanlar həyatını itirir. “Bədbəxt mülki insanları hərbi bölgələrə yönəltmək məqsədi güdən hər bir əməliyyat mahiyyətcə təhlükəlidir və ölümə səbəb olur”, – deyə o əlavə edib.
Qeyd edək ki, Ümumdünya Səhiyyə Təşkilatının məlumatına görə, son iki həftədə ərzaq yardımını əldə etməyə çalışan 500 nəfər həyatını itirib. İsrailin dəstəyi ilə fəaliyyət göstərən “Qəzza Humanitar Fondu” bu müddətdə 48 milyondan çox yemək payladığını açıqlayıb.
Digər tərəfdən, İsrail Xarici İşlər Nazirliyi BMT-ni Həmasla eyniləşdirməkdə ittiham edərək, Quterreşin ittihamlarını rədd edib. Təşkilatın yardım paylama nöqtələrində ölüm hallarının qeydə alınmadığını bildirən “Qəzza Fondu” BMT-ni “yalan informasiya yaymaqda” ittiham edib.
ABŞ Dövlət Departamenti isə fonda əlavə 30 milyon dollar maliyyə ayırdığını və digər ölkələri də dəstəyə çağırdığını bəyan edib.
