BAKI, AzerVoice
İranın nüvə bombası əldə etməsinə mane olmaq beynəlxalq ictimaiyyətin vəzifəsidir.
AzerVoice xəbər verir ki, İsrailin xarici işlər naziri Gideon Saar 12 günlük müharibədən sonra İran üzərində “tarixi qələbə” elan edildiyini bildirib və İranın nüvə silahına sahib olmasının qarşısının alınmasının beynəlxalq ictimaiyyət üçün “qaçılmaz bir vəzifə” olduğunu deyib.
Nazir Hayfa şəhərində İranın raket hücumuna məruz qalan əraziyə baxış keçirərkən jurnalistlərə verdiyi açıqlamada, İran rejiminin İsraili hədəfə almaqda davam etdiyini və region üçün təhlükə yaratdığını vurğulayıb: “Dünyanın ən ekstremist rejiminin ən təhlükəli silaha sahib olması yolverilməzdir. Bu, yalnız İsrailin deyil, bütün beynəlxalq ictimaiyyətin məsuliyyətidir.”
Xatırladaq ki, Gideon Saar bu açıqlamanı İranın xarici işlər naziri Abbas Arakçinin MAQATE rəhbəri Rafael Qrossini “pis niyyətli” adlandırmasına cavab olaraq verib. İran parlamentinin BMT-yə bağlı nüvə agentliyi ilə əməkdaşlığı dayandıran qanun layihəsini qəbul etməsi isə vəziyyəti daha da gərginləşdirib.
Qeyd edək ki, İsrail və ABŞ tərəfindən İranın nüvə obyektlərinə endirilən hücumların ardından İsrail baş naziri Benyamin Netanyahu çıxışında atəşkəsin əldə olunmasına baxmayaraq “İranın nüvə ambisiyalarını durdurduqlarını” bəyan etmişdi.
