BAKI, AzerVoice
ABŞ-da federal məhkəmə Tramp administrasiyasının Harvard Universitetinə qarşı qərarını dayandırıb.
AzerVoice xəbər verir ki, ABŞ-da federal hakim, Donald Tramp administrasiyasının beynəlxalq tələbələrin Harvard Universitetində təhsil almaq üçün ölkəyə girişinə məhdudiyyətlər tətbiq etməsi ilə bağlı qərarını hüquqa zidd hesab edib.
Boston dairəsinin federal hakimi Allison Burroughs, administrasiyanın bu təşəbbüsünü "hörmətli bir akademik quruma nəzarət etmək üçün yanlış cəhd" kimi qiymətləndirib və bunun ifadə və düşüncə azadlığına təhlükə yaratdığını bildirib. Hakim, administrasiyanın bu siyasətini dayandırmaq qərarını açıqlayıb.
Məlumata görə, Tramp administrasiyası kampuslarda keçirilən Fələstinlə bağlı etirazları və müxtəliflik, bərabərlik və inklüzivlik proqramlarını əsas gətirərək Harvard da daxil olmaqla bir sıra universitetlər üçün federal maliyyəni dondurmaqla hədələmişdi. Hətta Harvard Universitetinə ayrılmış 2,2 milyard dollar maliyyə vəsaiti və əlavə 60 milyon dollarlıq müqavilə haqqı dondurulmuşdu.
Qeyd edək ki, bu proses çərçivəsində ABŞ Ədliyyə Nazirliyi, Təhsil və Səhiyyə Departamentləri və Ümumi Xidmətlər Administrasiyası tərəfindən “Antisemitizmlə Mübarizə Qrupu” da yaradılmışdı. Harvard Universiteti isə bu qərarın qanunsuz olduğunu əsas gətirərək məhkəməyə müraciət etmişdi.
