BAKI,AzerVoice
ABŞ Prezidenti Donald Tramp, İranın nüvə proqramının inkişafında keçmiş prezident Barak Obamanı günahlandırıb.
AzerVoice xəbər verir ki, bu barədə Tramp sosial media platformasında paylaşımm edib.
"Biz bilirik ki, İranın nüvə proqramına görə kim məsuliyyət daşıyır!" – deyə paylaşılan postda qeyd olunub. Paylaşımda süni intellekt tərəfindən yaradılmış, Obamanın pul dəstələri fonunda poz verdiyi bir şəkil də yer alıb.
Xatırladaq ki, 13 iyun tarixində İsrail İranın müxtəlif şəhərlərində yerləşən nüvə obyektlərinə və ordunun yüksək rütbəli komandanlığına qarşı genişmiqyaslı hücumlar həyata keçirib.
Hücum nəticəsində İran Silahlı Qüvvələrinin Baş Qərargah rəisi, SEPAH-ın baş komandanı və bir neçə yüksək vəzifəli zabit, həmçinin doqquz nüvə alimi həyatını itirib.
İran Səhiyyə Nazirliyinin 15 iyun tarixli məlumatına əsasən, İsrailin hava zərbələri nəticəsində 224 mülki şəxs həlak olub, 1277-dən çox insan isə yaralanıb.
İranın cavab zərbəsi zamanı İsrail ərazisinə balistik raketlərlə hücum təşkil edilib. İran mediasının məlumatına görə, bu hücum nəticəsində İsraildə 25 nəfər ölüb, 500-dən çox insan yaralanıb.
