BAKI, AzerVoice

Məşhur britaniyalılar hökuməti Qəzzadakı zorakılığa şərik olmamağa çağırıb

AzerVoice xəbər verir ki, aralarında müğənni Dua Lipa, aktyor Benedikt Kamberbatç və futbolçu Qari Linekerin də olduğu 300-dən çox tanınmış şəxs Böyük Britaniya hökumətinə ünvanladıqları açıq məktubda Qəzzadakı vəziyyətə qarşı təcili tədbir görməyə çağırıblar.

“Select Love” təşkilatının təşəbbüsü ilə Britaniyanın Baş naziri Keir Starmerə göndərilən məktubda, İsrailə silah satışının dərhal dayandırılması, humanitar təşkilatların Qəzzaya buraxılması və hökumətin atəşkəs üçün vasitəçi kimi çıxış etməsi tələb olunub.

Məktubda qeyd olunub ki, İsrailin blokadası səbəbindən uşaqlar yardım ləvazimatlarına çata bilmədikləri üçün aclıqdan əziyyət çəkirlər.“İngiltərənin susqunluğu, Britaniya istehsalı olan silah hissələrinin Qəzzaya atılan bombalarda istifadə olunması ilə uşaqların həyatını birbaşa təhlükəyə atır” - deyə qeyd edilib.

Qəzzada 71 mindən çox 4 yaşdan kiçik uşağın qidasız qaldığı bildirilən məktubda “Uşaqlar ağlaya bilməyəcək qədər zəifləyir, səsləri aclıqdan kəsilir. Tarix bunu unutmayacaq. Baş nazir, qərar sizindir: müharibə cinayətlərinə ortaq olmaq, yoxsa cəsarətli addım atmaq?” - deyə vurğulanıb.

Qeyd edək ki, məktubu imzalayanlar arasında Annie Lennox, Paloma Faith, Benedict Cumberbatch, Tilda Swinton, Lena Headey, Massive Attack, Primal Scream və digər sənətçilərlə yanaşı, Holokost sağ qalanı Stephen Kapos da yer alıb.