BAKI, AzerVoice
Almaniya Silahlı Qüvvələrinin Baş Qərargah rəisi Karsten Brover 2029-cu ilə qədər ordunun silah və digər hərbi avadanlıqlarla tam təchiz olunmasını əmr edib.
AzerVoice xəbər verir ki, bu barədə Reuters agentliyi məlumat yayıb.
Məlumata görə, Brover və NATO-nun digər rəsmilərinin qiymətləndirməsinə görə, Rusiya həmin vaxta qədər hərbi qüvvələrini bərpa edib Alyansın ərazisinə hücum edə biləcək vəziyyətə gələ bilər.
"Hazırlığın gücləndirilməsi üçün istiqamətverici prioritetlər" adlı sənəddə Brover qeyd edir ki, Almaniya bu hədəfə mart ayında ölkənin borc yükünün azaldılması çərçivəsində ayrılan vəsaitlə çatacaq.
Brover təlimatında NATO-nun daha əvvəl irəli sürdüyü prioritetlərə uyğun şəkildə dərhal əldə olunmalı və ya inkişaf etdirilməli olan silah sistemlərini qeyd edib.
Bu prioritetlər arasında Almaniyanın tükənmiş hava hücumundan müdafiə qabiliyyətinin xüsusilə pilotsuz uçuş aparatlarına qarşı gücləndirilməsi də var.
Sənəddə bildirilib ki, digər əsas prioritetlər sırasında yüksək dəqiqliklə uzaq məsafələrə – düşmənin cəbhə xəttindən 500 km-dən çox aralı məsafəyə zərbələr endirmək qabiliyyətinin artırılması da yer alır.
Brover, Almaniyada sursat ehtiyatlarının bərpasını və bütün sursat növlərinin ehtiyat hədəflərinin yüksəldilməsini də əmr edib.
Sənəddə göstərilən digər önəmli prioritetlərdən biri də Almaniyanın kiber müharibə sahəsində imkanlarının sürətlə genişləndirilməsi və kosmosda çevik hücum və müdafiə qabiliyyətləri sisteminin yaradılmasıdır.
