BAKI, AzerVoice

Qərb bir əsr əvvəl Yaxın Şərqə xəritələr, mandatlar, süni sərhədlər və xarici idarəetmə vasitəsilə zorla nizam gətirməyə çalışıb.

AzerVoice xəbər verir ki, bunu ABŞ-ın Ankaradakı səfiri və Suriya üzrə xüsusi nümayəndəsi Tomas Barak deyib.

O, bu yanaşmanın Suriyanın və regionun imperial maraqlar uğrunda bölünməsi ilə nəticələndiyini vurğulayaraq, bunun nəsillərə başa gələn ağır bir səhv olduğunu bildirib.

“Bu səhvi bir daha təkrarlamayacağıq. Qərb müdaxilələrinin dövrü sona çatdı. Gələcək, regional həllərə, ortaq tərəfdaşlıqlara və qarşılıqlı hörmətə əsaslanan diplomatiyayla formalaşacaq” - deyə, Barak qeyd edib.

Barak, Suriyadakı son vəziyyətin əsas səbəbinin parçalanmışlıq olduğunu bildirib və bu ölkənin yenidən dirçəlişinin ancaq ləyaqət, birlik və Suriya xalqına yatırımla mümkün ola biləcəyini vurğulayıb. O, bu prosesin həqiqət, cavabdehlik və regional ölkələrlə əməkdaşlıq əsasında başlamalı olduğunu qeyd edib.

"Problemi ört-basdır etməklə yox, həqiqi dəyişikliklə həll etmək lazımdır" - deyə, Barak bildirib.

“Bu dəfə Türkiyə, Körfəz ölkələri və Avropa ilə birlikdəyik – artıq əsgərlərlə, xəyali sərhədlərlə yox, Suriya xalqının özü ilə çiyin-çiyinə dayanırıq. Əsəd rejiminin süqutu ilə birlikdə sülhün qapısını açmışıq. İndi isə sanksiyaları aradan qaldıraraq, Suriya xalqının rifah və təhlükəsizlik yoluna qovuşmasına imkan veririk” – deyə, o əlavə edib.