BAKI, AzerVoice
ABŞ-ın daxili təhlükəsizlik naziri Kristi Noem bazar günü İsrailə səfər edəcək.
AzerVoice xəbər verir ki, bu barədə məlumatı nazirliyin mətbuat xidməti yayıb.
Məlumata görə, bu qərar, İsrailin Vaşinqtondakı səfirliyinin iki nümayəndəsinin öldürülməsindən sonra verilib.
Məlumatda bildirilib ki, Vaşinqtonda baş verən son terror aktından sonra ABŞ Prezidenti Donald Tramp daxili təhlükəsizlik naziri Kristi Noemə İsrailə səfər etməyi tapşırıb. Səfər zamanı Noem İsrailin baş naziri Binyamin Netanyahu və hadisənin qurbanları ilə görüşəcək. Bazar ertəsi o, İsrailin xarici işlər naziri Gideon Saar ilə də görüş keçirdikdən sonra Polşaya yola düşəcək.
Qeyd edək ki, mayın 21-də Vaşinqtonda yerləşən Yəhudi Muzeyinin yaxınlığında baş verən silahlı hücum nəticəsində İsrail səfirliyinin iki əməkdaşı həyatını itirib. Şəhərin polis rəisinin verdiyi məlumata görə, öldürülənlər bir kişi və bir qadın diplomat olub. Onlar muzeydə keçirilən tədbirdən çıxarkən naməlum şəxs atəş açıb. Hücum edən şəxs saxlanılıb və saxlanılarkən “Fələstinə azadlıq!” şüarını səsləndirib.
