BAKI, AzerVoice

Konqo Demokratik Respublikası (KDR) ilə ABŞ arasında ölkənin zəngin təbii resurslarına Amerika kapitalının geniş çıxışını və qarşılığında təhlükəsizlik sahəsində dəstəyin verilməsini nəzərdə tutan razılaşma bu yay imzalana bilər.

AzerVoice xəbər verir ki, bu barədə Financial Times qəzeti məlumat verib.

Eyni zamanda KDR ilə Ruanda arasında sülh sazişi də paralel şəkildə hazırlanır və hər iki sənədin iyun ayının sonuna qədər imzalanması mümkündür. Lakin bu istiqamətdə hələ də əngəllər qalmaqdadır. KDR rəhbərliyi hər iki sazişi bir-biri ilə əlaqələndirir və Ruanda qoşunları şərqi Konqodan çəkilmədən, həmçinin Ruandanın M23 üsyançı qruplaşmasına dəstəyi dayandırılmadan ABŞ ilə xammal razılaşmasını imzalamaq istəmir.

ABŞ Prezidenti Donald Trampın Afrika üzrə baş müşaviri Massad Bulos bu ilin aprel ayında KDR və Ruanda hökumətlərinə sülh sazişinin ilkin layihəsini təqdim edib. O, gələn həftə Vaşinqtonda sülh danışıqlarının yeni mərhələsini təşkil etməyə çalışır.

KDR-nin Mədən Sənayesi naziri Kizito Pakabomba bildirib ki, ABŞ ilə bu razılaşma Konqonun tərəfdaş şəbəkəsini genişləndirməyə, eyni zamanda Çindən asılılığını azaltmağa imkan verəcək. Hazırda Çin, KDR-nin xammal sektorunda əsas hegemon gücdür."Africa Confidential"-ın məlumatına görə, bu xammal müqabilində təhlükəsizlik razılaşmasının ümumi dəyəri 3 trilyon dollar həcmində ola bilər.

Məlumat üçün bildirək ki, KDR dünyanın əsas mineral ehtiyatlarına sahib ölkələrindən biridir. Ölkə, xüsusilə elektromobil sənayesi üçün həyati əhəmiyyət daşıyan kobalt ehtiyatlarının təxminən 50 faizinə sahibdir.

Həmçinin qeyd edək ki, KDR rəhbərliyi Ruandanı ölkənin şərqindəki üsyançı qrupları dəstəkləməkdə ittiham edir. Ruanda isə öz növbəsində Konqonu ölkəsində hakimiyyəti devirməyə çalışan silahlı dəstələrə yardım göstərməkdə günahlandırır. Bu qarşılıqlı ittihamlar, razılaşmaların gələcəyini təhlükə altına qoyan əsas siyasi maneələrdən biridir.