Bakı, AzerVoice

Almaniya gələn ildən etibarən kifayət qədər könüllü cəlb edə bilmədiyi təqdirdə məcburi hərbi xidmətin bərpasını nəzərdən keçirə bilər.

AzerVoice xəbər verir ki, bu barədə Almaniyanın müdafiə naziri Boris Pistorius bildirib.

“Hazırkı modelimiz əsasən könüllü iştirak üzərində qurulub. Əgər elə bir məqam gəlsə ki, könüllü qeydiyyatlardan daha artıq ehtiyac yaranar, o zaman məcburi xidmət qərarı verilə bilər” - deyə, nazir qeyd edib.

O əlavə edib ki, bu məsələ ilə bağlı yeni qanun layihəsi 2026-cı ilin 1 yanvar tarixində qüvvəyə minə bilər.

Sosial Demokrat Partiyası isə uzun müddətdir ordu quruculuğunda könüllülük modelinə üstünlük verir.

Almaniya Silahlı Qüvvələrinin məlumatına görə, yaxın illərdə NATO qarşısındakı öhdəliklərini yerinə yetirmək üçün əlavə 100 min əsgərə ehtiyac var.

Xatırladaq ki, Almaniya 2011-ci ildə məcburi hərbi xidməti ləğv etmişdi.

Həmçinin qeyd edək ki, NATO üzvü olan Almaniya, 2022-ci ildə Rusiyanın Ukraynaya hücumundan sonra hərbi gücünü artırmaq niyyətindədir. Lakin orduya kifayət qədər yeni əsgər cəlb etməkdə çətinlik çəkdiyi görünür.