BAKI, AzerVoice

Tramp nüvə enerjisi ilə bağlı səs-küylü qərar verib.

Azervoice xəbər verir ki, ABŞ prezidenti Donald Tramp ölkənin nüvə potensialını genişləndirmək məqsədilə yeni icra sərəncamları imzalayıb.

ABŞ prezidenti Donald Tramp Oval Ofisdə keçirdiyi mətbuat konfransı ərəfəsində ölkənin enerji ehtiyaclarını qarşılamaq və nüvə sənayesini gücləndirmək üçün bir sıra icra sərəncamlarını təsdiqləyib. Tramp bəyan edib ki, bu addımlar ABŞ-ı nüvə texnologiyasında dünya liderinə çevirəcək.

“Bu gün nüvə enerjisi ilə bağlı böyük bir açıqlama veririk. Nüvə enerjisi həm təhlükəsiz, həm də ətraf mühit üçün təmizdir. Yeni sərəncamlar vasitəsilə biz bu sahədə əsl gücə çevriləcəyik”, – deyə Tramp bildirib.

Prezident qeyd edib ki, nüvə enerjisi texnologiya, təhlükəsizlik və maliyyə səmərəliliyi baxımından böyük inkişaf yolu keçib və bu səbəbdən ABŞ daha çox atom elektrik stansiyasının tikintisinə təşviq edəcək.

Qeyd edək ki, ABŞ-da nüvə enerjisi, xüsusilə iqlim dəyişikliyi ilə mübarizə çərçivəsində təmiz enerji mənbəyi kimi yenidən diqqət mərkəzinə çəkilib. Tramp administrasiyası da bu sahəyə sərmayələrin artırılmasını prioritet elan edib.