BAKI, AzerVoice
Qətər kral ailəsi ABŞ prezidenti Donald Trampa lüks Boeing 747-8 təyyarəsi hədiyyə edib.
AzerVoice xəbər verir ki, Qətər kral
ailəsinin ABŞ prezidentinə təqdim etdiyi 400 milyon dollarlıq
xüsusi dizaynlı Boeing 747-8 tipli jumbo təyyarənin görüntüləri
yayımlanıb.
Ekspertlər bu hava gəmisini "səmada uçan saray" kimi xarakterizə
edir və onun dünyanın ən dəbdəbəli prezident təyyarələrindən biri
olduğunu bildirirlər.
Xüsusi interyerə sahib bu təyyarə daha əvvəl Qatar Airways-in dövlət səviyyəli xidmətlər üçün istifadə etdiyi parkda yer alıb və əsasən kral ailəsinin üzvlərini və yüksək rütbəli qonaqları daşıyıb. İndi isə ABŞ Müdafiə Nazirliyinə təhvil verildikdən sonra, Donald Trampın prezidentliyi dövründə Air Force One təyyarəsi əvəzlənənədək müvəqqəti olaraq istifadə ediləcək.
Təyyarədə lüks yataq otaqları, duşlu vanna otaqları, şəxsi kabinet, geniş yemək və istirahət salonları, doqquz tualet, beş mini mətbəx və yüksək səviyyəli texniki imkanlar mövcuddur. İçi Fransanın məşhur dizayn evi Alberto Pinto Cabinet tərəfindən dizayn edilib və qızılı mebellərlə, dəri oturacaqlarla, əl işləri xalçalarla təchiz olunub.
Boeing 747-8, kommersiya versiyalarında 460-dan çox sərnişin daşımaq qabiliyyətinə malik olsa da, bu xüsusi konfiqurasiya təxminən 90 sərnişin və 14 ekipaj üzvü üçün nəzərdə tutulub. Təyyarənin texniki imkanları və dizaynı onu həm təhlükəsizlik, həm də komfort baxımından ən yüksək səviyyəyə çıxarır.
Prezident Tramp Truth Social platformasında yaydığı açıqlamada bildirib ki, Boeing-in yeni nəsil Air Force One təyyarəsinin istehsalı gecikdiyinə görə bu təyyarə müvəqqəti həll kimi istifadə ediləcək.
Qeyd edək ki, Boeing-in ABŞ prezidenti üçün hazırladığı yeni Air Force One təyyarələrinin ilkin olaraq 2024-cü ildə təqdim edilməsi planlaşdırılsa da, layihənin həm maliyyə, həm də texniki səbəblərlə 2027-ci ilə qədər təxirə salındığı bildirilir.
