BAKI, AzerVoice
Polşa Rusiyanın Krakovdakı Baş Konsulluğunu bağlayıb.
AzerVoice xəbər verir ki, Polşa
hökuməti Rusiyanın Krakov şəhərindəki Baş Konsulluğunun
fəaliyyətini dayandırmaq barədə qərar qəbul edib.
Bu addım ötən il Varşavada ticarət mərkəzində baş vermiş və geniş
ziyana səbəb olmuş yanğınla bağlı Rusiya xüsusi xidmət orqanlarına
qarşı irəli sürülən təxribat iddialarının fonunda atılıb.
Polşanın xarici işlər naziri Radoslav Sikorski “X” sosial media hesabında verdiyi açıqlamada, “Rusiya xüsusi xidmət orqanlarının Marywilska ticarət mərkəzində baş vermiş yanğına dair təxribatda iştirakını göstərən sübutlara əsaslanaraq, Rusiyanın Krakovdakı Baş Konsulluğunun fəaliyyət icazəsini ləğv etmək qərarına gəldim” - deyə bildirib.
Qeyd edək ki, 2024-cü ilin mayın 12-də Varşavanın Bialoleka rayonundakı ticarət mərkəzində güclü yanğın baş verib və mərkəzin demək olar ki, bütün hissəsi məhv olub. Polşanın baş naziri Donald Tusk hadisənin “Rusiya kəşfiyyat orqanlarının təşkil etdiyi yandırma” əməliyyatı olduğunu irəli sürüb. Təhlükəsizlik qüvvələri artıq bir neçə şübhəlini nəzarətə alıb, digərlərinin isə axtarışı davam etdirilir.
