BAKI, AzerVoice
Türkiyənin xarici işlər naziri Hakan Fidan, PKK terror təşkilatının özünü buraxması və silahları yerə qoyması barədə qərarını “tarixi və mühüm bir addım” kimi qiymətləndirib.
AzerVoice xəbər verir ki, Türkiyə, İordaniya və Suriya xarici işlər nazirlərinin iştirakı ilə keçirilən görüşdən sonra mətbuata açıqlama verən Fidan, bölgədə qalıcı sülh və sabitliyin təmin olunması baxımından bu qərarın əhəmiyyətli olduğunu bildirib:
“Bu qərarın verilməsindən sonra atılacaq praktik addımlar var. Biz bu prosesin davamını da yaxından izləyəcəyik.”
Nazir qeyd edib ki, Türkiyənin son 20 ildə əldə etdiyi demokratiya, azadlıq, rifah və təhlükəsizlik nailiyyətlərinin bölgəyə də müsbət təsir göstərməsi əsas arzularıdır:
“Əgər bu qərar səmimi şəkildə həyata keçirilərsə və digər narahatlıqları da aradan qaldıracaq şəkildə tətbiq olunarsa, bu, gələcəyimiz və vətəndaşlarımız üçün çox xeyirli bir addım olacaq.”
Fidan həmçinin bu qərarın Türkiyənin öz problemini öz ağlı və iradəsi ilə həll edə biləcəyini göstərdiyini vurğulayıb:
“Bu, xalqımız, bölgəmiz və mənsub olduğumuz sivilizasiya üçün son dərəcə önəmli bir addımdır.”
Nazir əlavə edib ki, bu məsələ günün ikinci yarısında keçiriləcək Kabinə toplantısında Rəcəb Tayyib Ərdoğanın rəhbərliyi ilə müzakirə olunacaq və ətraflı dəyərləndirmələr ictimaiyyətlə paylaşılacaq.
Qeyd edək ki, bu gün Terror təşkilatı PKK özünü ləğv etdiyini açıqlayıb.
