BAKI, AzerVoice

ABŞ-ın qlobal nüfuzu azalır, Çin isə daha populyar olur.

AzerVoice xəbər verir ki, Demokratiyalar Alyansı Fondunun 2025-ci il Demokratiya Qavrama İndeksinə əsasən, ABŞ dünyada əvvəlki nüfuzunu itirir, Çin isə imicini gücləndirərək bir çox regionda daha müsbət qarşılanır.

100 ölkədən 111 mindən çox insanın iştirak etdiyi sorğuda ABŞ-ın populyarlığının azalması, əvəzində Çinin ilk dəfə olaraq onu geridə qoyması diqqət çəkib. Xüsusilə Avropadan kənar bölgələrdə Çin haqqında müsbət rəy üstünlük təşkil edib. Hesabatda həmçinin bildirilir ki, Rusiya-Ukrayna müharibəsinə baxmayaraq, Moskvanın da imici müəyyən qədər yaxşılaşıb, lakin hələ də ABŞ-dan geri qalır.

Fondun təsisçisi və NATO-nun sabiq baş katibi Anders Foq Rasmussen ABŞ-a münasibətdəki azalmaların gözlənilən olduğunu deyib. Araşdırmada Donald Trampın Çin lideri Si Cinpinq və Rusiya prezidenti Vladimir Putindən daha az populyar olduğu da vurğulanıb. Sorğu iştirakçılarının 58 faizi Tramp haqqında mənfi fikir bildirib, prezidentin ümumi müsbət imici isə 27 faizlə məhdudlaşıb.

Eyni zamanda, İsrail sorğuda ən mənfi reputasiyaya sahib ölkə kimi qiymətləndirilib. Xüsusilə Yaxın Şərq və Cənubi Asiya bölgələrində İsrailin imici kəskin şəkildə pisləşib. Bu, respondentlərin İsrailin Fələstinə qarşı siyasətindən narazılıq ifadə etməsi ilə izah olunub.

Qeyd edək ki, sorğuda Tramp məşhur ictimai simalar — Elon Mask, Bill Gates, Papa Francis və Taylor Swift arasında ən aşağı reytinqə sahib şəxs kimi göstərilib.