BAKI, AzerVoice
Əlcəzair hökumətinin Fransa səfirliyinin əməkdaşlarının ölkədən çıxarılması barədə qərar Parisdə ciddi narazılıqla qarşılanıb.
AzerVoice xəbər verir ki, bu haqda Fransa Xarici İşlər Nazirliyinin verdiyi açıqlamada deyilir.
Açıqlamada, Fransa XİN bu addıma qarşı sərt cavab veriləcəyini bildirib.
Fransa xarici işlər naziri Jan Noel Baro isə sonradan verdiyi açıqlamada Əlcəzairin bu qərarını “anlaşılmaz və qəbuledilməz” adlandıraraq, ölkəsinin sərt şəkildə cavab verəcəyini bildirib.
Xatırladaq ki, Əlcəzair hökuməti dünən Fransanın Əlcəzairdəki səfirliyinin işlərini müvəqqəti icra edən şəxsi Xarici İşlər Nazirliyinə çağıraraq daha çox fransalı əməkdaşın ölkədən çıxarılacağını rəsmi şəkildə bildirib. Lakin çıxarılacaq şəxslərin sayı və bunun üçün qoyulan son tarix açıqlanmayıb.
Qeyd edək ki, rəsmi mənbələrin məlumatına görə, Əlcəzair tərəfi son dövrlərdə Fransanın ən azı 15 əməkdaşı diplomatik və konsulluq missiyalarına rəsmi xəbərdarlıq və ya akkreditasiya müraciəti olmadan təyin etdiyini müəyyən edib. Bu isə beynəlxalq diplomatik protokol və ikitərəfli sazişlərin pozulması kimi qiymətləndirilir.
Bundan əlavə, Əlcəzair hakimiyyəti Fransanı diplomatik pasport daşıyan Əlcəzair vətəndaşlarının ölkəyə girişini dəfələrlə rədd etməkdə, Paris və Marseldə təyin olunmuş iki baş konsulun akkreditasiyasını ləngitməkdə, və daha 7 konsulun akkreditasiya prosesini beş aydan çox müddətdə təxirə salmaqda ittiham edib.
