BAKI, AzerVoice
İran bu gün İsrailin kəşfiyyat xidməti “Mossad” üçün casusluq etməkdə və 2022-ci ilin mayında “Sepah”ın hərbi qanadı – “Qüds Qvardiyası”na bağlı olan komandir Səyyad Xodayinin qətlində iştirak etməkdə ittiham edilən bir nəfəri edam edib.
AzerVoice xəbər verir ki, bu barədə İran KİV-i məlumat yayıb.
Məlumata əsasən, yüksək səviyyəli casus kimi təqdim olunan Möhsün Lənkərənişin “Mossad”ın İranda həyata keçirdiyi bir neçə əməliyyatına dəstək verib. O hüquqi prosedurların tamamlanmasından sonra bu gün edam edilib.
Məlumatda qeyd olunur ki, o, polkovnik Səyyad Xodayinin qətlində iştirak edib. İsrail mediası Xodayini “Qüds Qvardiyası”nın 840-cı bölməsinin komandiri kimi təqdim edib və İran onun qətlində İsraili günahlandırıb.
“Bu agent, İran qanunlarına əsasən, sionist rejimə casusluq və xəyanətə görə ədalətli cəzasını aldı” - deyə, məlumatda qeyd olunub.
Məlumata görə, "Mossad" casusu olan Möhsün Lənkərənişin bu təşkilata 2020-ci ilin oktyabrında qoşulub və həmin ilin dekabrında ilk casusluq missiyasına başlayıb. İran, məhkəmə bəyanatında onu sionist rejimin ən mühüm casuslarından biri adlandırıb. Onun Mossad zabitlərinin təlimatları ilə həssas obyektləri fotoşəkillə sənədləşdirdiyi və gələcək əməliyyatlar üçün hədəfləri müəyyənləşdirdiyi bildirilib.
