BAKI,AzerVoice
ABŞ Prezidenti Donald Tramp Ukrayna Prezidenti Volodimir Zelenski ilə keçirdiyi söhbətdə Krımın Rusiya ərazisi kimi tanınması niyyətini təsdiqləyib, lakin Kiyevdən eyni addımı atmasını tələb etməyib.
AzerVoice xəbər verir ki, aprelin 26-da Vatikanda Roma Papası ilə vidalaşma mərasimindən əvvəl baş tutan görüşdə Zelenski Krımın Rusiya ərazisi kimi tanınmayacağını bir daha vurğulayıb.
Tramp isə açıq şəkildə bildirib ki, o, Ukraynadan bu tanınmanı tələb etmir və plan yalnız ABŞ-ın bu addımı atmasını nəzərdə tutur.
Zelenski münaqişəni dayandırmaq üçün güzəştə getməyə hazır olduğunu, lakin bunun müqabilində təhlükəsizlik təminatları tələb etdiyini Trampa çatdırıb. Eyni zamanda, ABŞ lideri Zelenskidən ABŞ və Ukrayna arasında faydalı qazıntılarla bağlı razılaşmanı tez bir zamanda imzalamasını istəyib.
Söhbət zamanı Zelenski yenidən ABŞ-dan hərbi dəstək və silah tələb edib. Bu görüş Rusiya-Ukrayna münaqişəsinin həlli ilə bağlı ABŞ-ın mövqeyindəki mümkün dəyişiklikləri və Krım məsələsinin gələcək taleyini müzakirə edən mühüm bir hadisə kimi qiymətləndirilir.
Trump administrasiyasının bu planı rəsmi şəkildə həyata keçirib-keçirməyəcəyi isə hələlik bəlli deyil.