Bakı, AzerVoice

İsrail rəhbərliyi Fələstin dövlətini tanımağa qərar verən Norveçlə diplomatik əlaqələrinə zərər vura biləcək qərar verib.

AzerVoice xəbər verir ki, İsrail Xarici İşlər Nazirliyi Norveç səfirliyinə məlumat verib ki, Ramallahdakı Fələstin Muxtariyyətində çalışan norveçli diplomatlar "Tel-Əviv də daxil olmaqla İsrail sərhədləri daxilində yaşaya bilməzlər".

Norveç İsrailə xəbərdarlıq edib ki, İsrailin Fələstin Administrasiyası ilə işləyən Norveç rəsmilərinin diplomatik statusunu ləğv etmək qərarına görə iki ölkə arasındakı münasibətlər korlanacaq.

Norveçin xarici işlər naziri Espen Bart Eide cümə axşamı verdiyi açıqlamada, "Bu gün qəbul edilən qərarın baş nazir Benyamin Netanyahu hökuməti ilə münasibətlərimiz üçün nəticələri olacaq. Netanyahu hökumətinin yaratdığı bu vəziyyətə Norveçin cavab vermək üçün hansı tədbirləri görəcəyini müzakirə edirik",- deyə bildirib.

İsrailin qərarını "ifrat" adlandıran Eide, "Bu qərar ilk növbədə Fələstin xalqına kömək etmək qabiliyyətimizə təsir edir" dedi. Eide, İsrail və Norveçin xüsusilə bölgədəki əhəmiyyətli gərginlik fonunda "yaxşı işləyən diplomatik kanalları" mühafizə etməsinin vacib olduğunu vurğuladı.

"Norveç həmişə İsrailin və İsrail xalqının dostu olub və bundan sonra da olacaq. Norveç eyni zamanda işğalı, Qəzzada müharibənin həyata keçirilmə formasını və bunun fələstinli mülki əhaliyə verdiyi əziyyətləri tənqid edərkən də konkret olmuşdur",- deyə o əlavə edib.

İsrail Xarici İşlər Nazirliyi qeyd edib ki, Fələstinə göndərilən norveçli diplomatlar akkreditasiya edilməyəcək, həmçinin Norveçin Fələstin Muxtariyyətindəki nümayəndəliyində xidmət etmək üçün göndərilən Norveç rəsmilərinin İsraildəki diplomatik statusu da ləğv ediləcək.

Qeyd edək ki, ötən ay da İsrail tərəfindən Eidenin İsrailə səfərinə icazə verilməməsi ilə bağlı qərar qəbul edilmişdi.