Bakı,
AzerVoice
Ağ Ev, ABŞ-ın şimal-şərqində sakinlər tərəfindən müşahidə edilən
sirli dronların qanuni fəaliyyət göstərdiyini təsdiqləyib.
AzerVoice xəbər verir ki, bu açıqlama,
yeni seçilmiş prezident Donald Trampın hökuməti məsələ ilə bağlı
şəffaf olmağa çağırmasından sonra verilib.
Milli Təhlükəsizlik Şurasının sözçüsü Con Kirbi mətbuata
açıqlamasında , "Bu mərhələdə qiymətləndirməmiz budur ki, müşahidə
edilən dronlar ya kommersiya, ya hobbi, ya da hüquq-mühafizə
məqsədilə istifadə olunan pilotsuz uçuş aparatlarıdır və onların
fəaliyyəti qanunidir."- deyə bildirib.
Kirbi əlavə edib ki, bəzi qorxu içində olan sakinlər dron kimi
görünən kiçik təyyarələri və hətta ulduzları belə səhvən dron hesab
ediblər.
Ağ Ev rəsmiləri, dronların istifadəsi ilə bağlı narahatlıqları
nəzərə aldıqlarını bildirərək, ictimaiyyətin məlumatlandırılması
üçün səyləri davam etdirəcəklərini qeyd ediblər.
Qeyd edək ki, ilk dəfə noyabr ayında görülən sirli pilotsuz uçuş
aparatları (PUA) ilə bağlı ABŞ-ın Nyu-York və Nyu-Cersi ştatlarının
qubernatorları tərəfindən məsələni araşdırmaq üçün səlahiyyətli
orqanlara çağırış edilmişdi. Yeni seçilmiş prezident Donald Tramp
da sosial media hesabında paylaşdığı açıqlamada bu vəziyyəti
hökumət nəzarətinin bir çatışmazlığı kimi göstərərək, "Ya
açıqlayın, ya da dərhal onları vurun" ifadəsini işlətmişdi.
